Ակադեմիկոս Ֆիլատովի կախարդական խառնուրդը. ankakh.com

Ասում են` խորհրդային անվանի ակնաբույժ Վ.Պ. Ֆիլատովի կլինիկայում տեղեկատվական ցուցանակի վրա փակցված բաղադրատոմսը հիվանդները գրառել ու կիրառել են: Եվ նրանց մոտ վերականգնվել է տեսողությունը: Այնքան ակնհայտ արդյունք է ստացվել, որ բաղադրատոմսն իմացողները կանոնավոր օգտագործել են պատրաստված խառնուրդը:

Հալվեի 100 գ հյութը, 500 գ մանրացրած ընկույզը, 300 գ մեղրն ու 3-4 կիտրոնի հյութը լավ խառնել և ուտել 1 դ. գդալ` օրական 3 անգամ, ուտելուց 30 րոպե առաջ: Պետք է կիրառել այնքան ժամանակ, մինչև զգալի բարելավում լինի: Ի դեպ, այս խառնուրդը ո՛չ միայն տեսողությունն է բարելավում, այլև ընդհանուր կազդուրիչ ազդեցություն է ունենում օրգանիզմի վրա:

Կարևոր է մի բան հիշել. հալվեն պետք է առնվազն 2-3 տարեկան լինի:

Դրա համար հարկավոր է օգտագործել բույսի ստորին ու միջին տերևները, գագաթին ձեռք չտալ, բայց վերին հատվածից ևս 3-4 տերև պոկել, ապա լվանալ եռման ջրով, հեռացնել ատամիկները, մանրացնել մնացածը, լավ տրորել ու հյութաքամիչով կամ երկտակ թանզիվով քամել:

Ակադեմիկոսը խորհուրդ էր տալիս լվացած տերևներն իսկույն չկտրատել, այլ ափսեով դնել սառնարանը 10-12 օր: Հալվեի տերևներում նման պայմաններում առաջանում է նյութ, որը ստացել է «կենսածին խթանիչ» անվանումը: Այն խթանում է բջիջների կենսագործունեությունը: Դրանից հետո հալվեի տերևները կրկին լվանում են ու կատարում վերոնշյալը:

Պետք է հիշել. տվյալ խառնուրդը պետք չէ շատ երկար օգտագործել, քանի որ կարող է գրգռել աղիքների լորձաթաղանթն ու բորբոքում առաջացնել:

Տարիքի հետ ի՞նչ է պատահում տեսողությանն ու աչքերին

Ծննդյան պահից երեխաները շատ զգայուն են լույսի նկատմամբ, չեն կարողանում հայացքը կենտրոնացնել օբյեկտների վրա կամ տարբերակել գույները: Երեխայի տեսողությունը շարունակում է զարգանալ ծննդյան առաջին մի քանի ամիսների ընթացքում:

Առաջին ամսում նրանց տեսողությունը սկսում է կենտրոնանալ 1 մ հեռավորության վրա գտնվող որոշակի օբյեկտի վրա: 4-րդ ամսում երեխան հստակ տարբերում է իրերը, որոնք գտնվում են սենյակի հակառակ կողմում: Բացի այդ, երեխան լիովին տարբերում է գույներն ու երանգները:

Տեսողության ստուգումն առաջին անգամ

Մանկաբույժը կարող է ստուգել երեխայի տեսողությունը կյանքի առաջին տարում պլանային ստուգման ժամանակ: Իսկ տեսողական խնդիրներ, ինչպիսիք են կարճատեսությունը կամ հեռատեսությունը, երեխայի մոտ կարող են հայտնաբերվել կյանքի 3-րդ տարում:

Պետ՞ք է, որ երեխան ակնոց դնի

Դպրոցահասակ տարիքի երեխաներից 4-ից մեկը տեսողական խնդիր ունի, հիմնականում` կարճատեսություն, սակայն նրանց միայն մեկ երրորդն է դիմում ակնաբույժի: Մասնագետների մեծ մասը կարծում է, որ տեսողությունը լրջորեն պետք է ստուգել դպրոց ընդունվելուց առաջ, քանի որ հետագայում խնդիրը կարող է խորանալ: Իսկ ընդհանրապես, տեսողությունը հարկ է ստուգել երկու տարին մեկ:

Ի՞նչ է նշանակում «ծույլ աչք»

Ամբլիօպիան կամ «ծույլ աչքի» համախտանիշը հանդիպում է 100 երեխայից 2-3-ի մոտ: Դա առաջանում է այն ժամանակ, երբ ուղեղի ու աչքերից մեկի նյարդային ազդակները լիարժեք չեն գործում: Երեխաների մեծ մասին բուժում են մեկ աչքին կապ դնելով կամ այլ մեթոդներով:

Շլությունն առաջանում է այն ժամանակ, երբ աչքերից մեկը շեղվում է տեսողական առանցքից: Հատուկ ակնոցը, վիրահատությունը կարող են շտկել խնդիրը:

Համակարգիչ ու աչքերի գերլարվածություն

Համակարգչի, սմարթֆոնի ու տեսախաղերի ժամանակ էկրանին սևեռուն ու երկարատև հայացքը կարող է աչքերի գերլարվածություն, չորություն ու հոգնածություն առաջացնել: Այդ լարվածությունը թուլացնելու համար պետք է մոնիտորը տեսադաշտում լինի 60 սմ հեռավորության վրա: Լավ կլինի կիրառել նաև սեղանի լամպեր, էկրանի փայլը նվազեցնելու համար ու աչքերին հանգստություն պարգևել աշխատանքի յուրաքանչյուր 2 ժամը մեկ: Դրա համար հարկավոր է պարզապես հայացքը հառել մոնտիտորից ավելի հեռուն գտնվող օբյեկտներին:

Մեծե՛ր, պահպանեք տեսողությունը

Առողջ մեծերը մինչև 40 տարեկան տեսողական խնդիրներ չեն ունենում: Աչքերի առողջությունը պահպանելու համար պետք է արևապաշտպան ակնոց դնել, ցանկալի է` ուլտրամանուշակագույն պաշտպանությամբ: Պետք է միշտ պաշտպանական ակնոց դնել նաև սպորտային խաղերի, մեխանիկական սարքավորումների կամ քիմիկատներով աշխատելու ժամանակ:

Ակնոց ընթերցանության համար՛

Ընթերցանության համար անպայման ակնոց դնելու պահանջը միջին տարիքի ամենաառաջին նշաններից է: Մինչև 40-45 տարեկանը հնարավոր է, որ տարբեր ֆունկցիաների համար տարբեր ակնոցներ պահանջվեն: Դա նորմալ երևույթ է այդ տարիքի համար, իսկ այդ փոփոխությունը կոչվում է պրեսբիօպիա: Նման դեպքերում արդյունք է տալիս երբեմն լազերային վիրահատությունը:

Ի՞նչ է պրեսբիօպիան

Մինչև 40 տարեկանն աչքի բյուրեղիկը շատ ճկուն է ու այդ հատկության շնորհիվ աչքը կարողանում է ինչպես մոտ, այնպես էլ հեռադիր իրերի վրա տեսողությունը կենտրոնացնել: Պրեսբիօպիայի առաջին ախտանշանն այն է, որ ճաշացանկը կամ գրքի տեքստը տեսնելու համար փոքր-ինչ ստիպված եք գիրքը կամ տվյալ օբյեկտը հեռացնել:

Տարիքային հիվանդություններն ու տեսողությունը

Որոշ հիվանություններ, ինչպիսին, օրինակ, շաքարային դիաբետն է կամ արյան բարձր ճնշումը, կարող է ազդել տեսողության ու աչքերի առողջության վրա:

Դիաբետը հասուն մարդկանց կուրության հիմնական պատճառն է: Ազդում է նաև դիաբետիկ ռետինոպաթիան (ցանցաթաղանթի արյունատար անոթների վնասումը): Արյան բարձր ճնշումը կարող է վնասել աչքի արյունատար անոթներն ու նյարդերը, ինչը կարող է հանգեցնել տեսողության ամբողջական կորստի:

Կատարակտ ու գլաուկոմա

Կատարակտն ու գլաուկոման կարող է ցանկացած տարիքում առաջանալ, սակայն հիմնականում այդ հիվանդությունների տարիք է համարվում 60-ը և դրանից հետո: Կատարակտը աչքի բյուրեղիկի մգացումն է, խամրումը: Այն հեշտությամբ կարելի է հեռացնել ու փոխարինել հատուկ բյուրեղիկով:

Գլաուկոման աչքի ոսպնյակի կապտավուն մթագնումն է, որը տարբեր անուններով է հայտնի` «սև, դեղին կամ կանաչ ջուր»: Հիմանական ախտանշանը ներակնային ճնշման բարձրացումն է: Գլաուկոման բուժվում է ներակնային ճնշումն իջեցնող դեղորայքով, աչքի կաթիլներով կամ վիրաբուժական եղանակով:

Մակուլյար դիստրոֆիա

Սա ևս 60 ու ավելի տարիքի մարդկանց աչքի հիվանդություն է ու կարող է տեսողության մասնակի կորստի պատճառ դառնալ: Խոնավ մակուլյար դիստրոֆիան զարգանում է այն ժամանակ, երբ անցանկալի արյունատար անոթներ են գոյանում աչքի մեջ: Հիանդությունը բուժվում է դեղորայքով: Այդ դիստրոֆիան նվազ ընդգծված արտահայտություն ունի ու հատուկ բուժում չի պահանջվում: Սակայն վիտամինները կարող են դանդաղեցնել դրա զարգացումը:

Սնունդն ու տեսողությունը

Ճիշտ սնվելն օգնում է աչքերի առողջությանը: Սակայն որոշ սննդատեսակներ վնասում են տեսողությունը:

Լյուտեինը, օմեգա-3-ը, ճարպաթթուները, C, E վիտամինները կօգնեն պաշտպանելու աչքերի առողջությունը: Պետք է հետևել, որ սննդաբաժնում բավարար քանակությամբ ցիտրուսներ լինեն, կանաչ ու տերևավոր բանջարեղեն, ընկույզ ու յուղոտ ձուկ: Ձկան ու տերևավոր բանջարեղենի կիրառումը կարող է կանխել տարիքային մակուլյար դիստրոֆիան:

Իսկ պայծառատես Վանգան առողջությունը պահպանելու համար խորհուրդ էր տալիս զուսպ լինել, շատ ուտելուց խուսափել:

«Դա շատ հեշտ է, ես ոչ մի առանձնահատուկ բաղադրատոմս չունեմ, ու յուրաքանչյուր ոք լավ գիտի, թե ինչ պետք չէ անել: Առաջին հերթին` շատ չուտել: Մթերքն առանց այդ էլ վատն է դարձել մեծ քանակությամբ պարարտանյութերի պատճառով, իսկ մարդու բոլոր օրգաններն են տուժում ավելորդ սննդից: Եթե մեզ պետք լիներ շատ ուտել, ապա բնությունը մեզ 2 ստամոքս կտար, իսկ մեկի համար այդ ամենը չափազանց շատ է:

Ավելի շատ սպիտակ սնունդ կերեք: Հաճախակի անտառային խոտերից թեյ խմեք: Կրճատեք սննդի մեջ ճարպերի քանակը: Նա, ով առողջ է, աստիճանաբար պետք է նվազեցնի մսի քանակն ու, ի վերջո, հրաժարվի դրանից: Գոնե շաբաթական մեկ անգամ խաշած ցորեն կերեք ու անպայման ջուր խմեք ուժեղ լինելու համար: Մի՛ ծխեք:

Մարդը պետք է առաջին հերթին հոգ տանի իր հոգեկան առողջության մասին, ապրի իր, մարդկանց ու շրջակա միջավայրի հետ ներդաշնակության մեջ: Բարությունն է կարևորագույն որակը: Յուրաքանչյուրն այս կյանքում իր առաքելությունն է անում, ենթարկվում տիեզերական ռիթմին ու կարգուկանոնին: Դրա խանգարումը հանգեցնում է այնպիսի հետևանքների, որոնց համար մարդկությունն, ուշ թե շուտ, պետք է վճարի: Ու վճարում է արդեն հիմա»:

Հարցեր, պատասխաններ, մեկնաբանություններ